Gəncənin Xan bağında güllər əkilib.
Gencexeber.az məlumat verir ki, Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyinin (MKTİB) Yaşıllaşdırma şöbəsinin istixanalarında, yerli mütəxəssislər tərəfindən yetişdirilən gül və kol bitkiləri Qafqazın ən qədim parklarından biri olan Xan bağına köçürülüb.
Bildirilib ki, bağda müxtəlif bitki növlərinin qorunub saxlanılması, təbii yolla artımının təmin edilməsi məqsədilə MKTİB tərəfindən müt'madi olaraq yaşıllıq aksiyaları keçirilir.
Bu dəfə parka yaz mövsümünün gülləri və kol bitkiləri əkilib, mövcud yaşıllığa aqrotexniki qulluq göstərilib, suvarılması təmin edilib. Görülən işlərin məqsədi Xan bağının ekoloji zənginliyini artırmaqla yanaşı bura gələn şəhər sakinlərinə və şəhərimizin qonaqlarına göz oxşayan güllərlə xoş anlar yaşatmaqdır.
Analoji gül əkini işləri Nizami Gəncəvi prospektindəki "əllərin dairəsi" deyilən ərazidə də həyata keçirilib.
Hər iki məkan petunya, marqarita, taqeres, cinerariya və türk qərənfili gülləri ilə bəzədilib.
