Gəncə şəhərinin Cavad Rəfibəyli küçəsində yeni salınmış asfalt örtüyündə çökmələr yaranıb.
Gencexeber.az-a müraciət edən sakinlərin sözlərinə görə, bir neçə ay əvvəl küçədə Azərbaycan Avtomobil Yolları Dövlət Agentliyinin Qazax rayonu 28 №-li Yol İstismar MMC tərəfindən təmir işləri aparılıb. Lakin görülən işlərin keyfiyyəti sakinlərin narazılığına səbəb olub.
Vətəndaşlar bildirirlər ki, küçənin bəzi hissələrində bordürlər düzülməyib, piyada səkisi isə asfaltlanmayıb, bitum qırıntıları tökülüb.
Sakinlər iddia edirlər ki, yol təmiri tələm-tələsik aparılıb və asfalt gecə saatlarında salınıb. Hazırda yolun səthi bir sıra hissələrində kələ-kötür vəziyyətdədir.
