Goranboy rayonunda ağır qətl hadisəsi baş verib.
Gencexeber.az məlumat verir ki, hadisə rayonun Goranboy–Borsunlu yolunda qeydə alınıb.
İlkin məlumata görə, 2003-cü il təvəllüdlü Sevinc Məmmədovanın idarə etdiyi "Nissan Note" markalı avtomobil 1992-ci il təvəllüdlü həyat yoldaşı Rövşən Məmmədovun idarə etdiyi "Hyundai Elantra" tərəfindən qəsdən vurulub.
Bildirilib ki, qəza zamanı avtomobildə Sevinc Məmmədova, onun ögey anası, 1974-cü il təvəllüdlü Natalya Dudenko və atası, 1966-cı il təvəllüdlü Adil Nuriyev olub. Hadisədən sonra Sevinc Məmmədova avtomobildən düşüb və bu zaman əri tərəfindən bıçaqlanaraq qətlə yetirilib.
Məlumata əsasən, arxa oturacaqda olan Natalya Dudenko avtomobildə sıxılmış vəziyyətdə qalıb və həyatını itirib. Adil Nuriyevin isə qəza zamanı yüngül xəsarət alıb.
Hadisədən sonra iki qadının ölümünə səbəb olduğu deyilən Rövşən Məmmədov ərazidən uzaqlaşaraq boş sahəyə qaçıb. Orada özünə xəsarət yetirən kişi ölüb.
Mərhumların yaxınlarının verdiyi məlumata görə, Sevinc və Rövşən Məmmədovlar boşanmaları ilə bağlı keçirilən məhkəmə iclasından qayıdırmışlar.
Faktla bağlı Goranboy rayon prokurorluğunda araşdırma başlanılıb.
