Gəncədə gənclər üçün layihə təşkil olunub. Bu haqda Gencexeber.az-a 27 oktyabr tarixində məlumat daxil olub.
“Gənclərin sosial sahibkarlıq bacarıqlarının inkişafı proqramı” forum tədbiri başa çatıb. Birinci mərhələdə "Sosial sahibkarlıq nədir", "Sosial sahibkarlıq və Xeyriyyəçiliyin fərqi", "Biznes Model Kanvasın izahı" və "Donorların müəyyənləşdirilməsi" mövzularında sessiyalar keçirilib. Layihəyə 25 nəfər qatılıb. Onlar müvafiq olaraq komanda işləri, təqdimatlar və müxtəlif əyləncəli enercayzerlərdə iştirak ediblər.
Layihənin yekun tədbiri "Sosial sahibkarlıq: potensial imkanlar, mövcud vəziyyət və gözləntilər" mövzusunda olub. Burada Dövlət Məşğulluq Agentliyinin Regional Məşğulluq filialının Təhlil və Tərəfdaşlarla iş şöbəsinin müdiri Pərviz Əliyev, KOBİA-nın regional koordinatoru Anar Əliyev, Azərbaycan Texnologiya Universitetinin İnnovasiya Mərkəzinin startaplar üzrə mütəxəssisi Tural Rüstəmov və "Təmas Sərvi" MMC Sosial sahibkarlıq müəssisəsinin təsisçiləri Kübra Ələkbərova və Südabə Məmmədova iştirak ediblər. Onlar qurumların müvafiq imkanları və sosial sahibkarlıq sahəsi ilə bağlı panel müzakirə aparıblar. Daha sonra tədbir iştirakçılarının sualları cavablandırılıb.
Layihənin məqsədi gənclərin sosial sahibkarlıq üzrə ideyalarının üzə çıxarılması və müxtəlif dövlət və özəl qurumlarla birgə əməkdaşlığı və təbliğatı gücləndirməkdir. Tədbir Qeyri-Hökumət Təşkilatlarına Dövlət Dəstəyi Agentliyinin dəstəyi və “Gələcəyə Körpü” Gənclər İctimai Birliyinin təşkilatçılığı ilə keçirilib.
