Gəncədə dirəklərdən biri sakinlər üçün təhlükə yaradır. Bu haqda 29 noyabr tarixində Baku.ws-ə istinadən məlumat veririk.
Sözügedən hal şəhərin Atatürk prospektində müşahidə olunur. Sakinlər bildirirlər ki, burada küçənin işıqlandırılması üçün quraşdırılmış dirək qəzalı vəziyyətdədir. Onlar bədbəxt hadisənin baş verməsindən narahat olduqlarını deyirlər.
“Artıq 20 günə yaxındır ki, dirək bu vəziyyətdədir. Evimin üzərinə düşməsindən ehtiyat edirəm. Aidiyyəti üzrə müraciət etmişəm, qeydə alınıb. Bir nəfər gəldi, baxdı. O da dirəyin kabellər çıxan hissəsini fırlatdı və bildirdi ki, hazırda dirəyi bərpa etmək üçün materialları yoxdur. Küləkli havada çox narahat oluruq ki, dirək aşacaq”,- sakin bildirib.
Məsələ ilə bağlı MKTİB-nin Şəhər işıqlandırılması şöbəsindən açıqlama verilib. Bildirilib ki, sözügedən əraziyə baxış keçirilib:
“Qeyd edilən işıq dirəyinin aşma təhlükəsi yoxdur. İşıq dirəyinin qırılmış hissəsinin təmiri ilə bağlı material sifariş verilib. Lazımi material əldə edildikdən sonra işıq dirəyinin təmiri üzrə işlər aparılacaq”.
