Müsəlmanlar üçün müqəddəs olan Ramazan ayının 3-cü günüdür. Bununla bağlı Gəncəxəbər.az redaksiyası olaraq oruc tutan izləyicilərimizə qida ilə bağlı bəzi tövsiyələri təqdim edirik.
Oruc tutan şəxs yağlı və karbohidratlarla zəngin qidalardan az istifadə etməlidir. Əsas rasion zülal olmalıdır ki, insan gün ərzində enerjili olsun. Yeməklərin temperaturu həddindən artıq isti və ya soyuq olmamalıdır. Günboyu boş qalan mədəyə soyuq qidanın daxili spazmlara səbəb ola bilər.
Bundan başqa, oxucularımızın nəzərinə çatdırmaq istəyirik ki, imsaka oyanmamağın zərərləri var. Boş mədəyə oruc tutmaq aclıq hissini çoxaldır. Nəticədə insan orqanizmində maddələr mübadiləsinin sürəti pozula bilər.
İftarla müqayisədə imsakda daha gec həzm olunan qidalar qəbul edilməlidir. Həmin qidaların arasında süd məhsulları, yumurta, liflə zəngin yaşıl yarpaqlı tərəvəzlər yer alır. Sadə ağ çörək yerinə kəpəkli çörəkdən istifadə etmək tövsiyə edilir. Çünki sonuncu 4 dəfə gec həzm olunur.
Mədəni birdən-birə yükləmək düz deyil. Çünki aclıq zamanı maddələr mübadiləsi zəifləyir və çoxlu qida qəbulu köp, sancı və qəbizliyə səbəb ola bilər. Həmçinin davamlı qida qəbulu təzyiq və şəkər yüksəlməsi ilə nəticələnir.
Adətən, iftarda oruc su və xurma ilə açılır. Daha sonra sulu yeməklərə üstünlük verilir. Bir az fasilənin ardından ət məhsullarının yerinə zülalla zəngin paxlalılara (mərci, lobya, noxud) üstünlük verilə bilər. Sonda yaşıl çay, nanə, zəncəfil, adaçayı, məkkəgülü, darçın, hil, cirə, mixək kimi bitkilərin tək-tək və ya qarışıq halda dəmlənib içilməsi orqanizm üçün faydalıdır.
Oruc tutan şəxslərdə gün ərzində maye və mineral itkisi olur. Bu vəziyyəti kompensasiya etmək üçün iftar və sahur arasında bol maye və minerallarla zəngin olan suya üstünlük verilməlidir. Həmçinin iftardan 1-2 saat sonra yüngül məşqlər və ya qısa gəzinti məsləhət görülür.
