Gəncədə regional müşavirə keçirilib. Bu haqda 2 dekabr tarixində İcra Hakimiyyətinə istinadən məlumat veririk.
Tədbir İqtisadiyyat Nazirliyi yanında Əmlak Məsələləri Dövlət Xidməti və İcra Hakimiyyətinin birgə təşkilatçılığı ilə baş tutub. Burada torpaq idarəçiliyi sahəsində münasibətlərin tənzimlənməsi, bu sahədə nöqsanların aradan qaldırılması istiqamətində maarifləndirici tədbirlər, aidiyyəti dövlət orqanları ilə əməkdaşlıq müzakirə olunub.
Müşavirədə Gəncə şəhəri, Daşkəsən, Göygöl və Samux rayonlarının yerli icra hakimiyyəti orqanlarının məsul əməkdaşları, aidiyyəti dövlət qurumlarının, bələdiyyələrin nümayəndələri iştirak ediblər. Öncə Əmlak Məsələləri Dövlət Xidmətinin və yerli icra hakimiyyəti orqanlarının nümayəndələri bələdiyyələr tərəfindən qaldırılmış məsələləri yerində araşdıraraq, onların həlli istiqamətində təklif və tövsiyələrini verib, qanunvericiliyin tələblərini diqqətə çatdırıblar.
Burada dövlət əmlakının idarə edilməsi, istifadəsi və mühafizəsinə nəzarət olunması, bələdiyyə torpaqlarının hüquqi və fiziki şəxslərin mülkiyyətinə və ya icarəsinə verilməsi ilə bağlı rəyvermə işləri və digər məsələlər, elektron baza xəritələrinin işlənməsi barədə məlumat verilib.
Region üzrə torpaq və üzərindəki daşınmaz əmlaklar barəsində müfəssəl kadastr məlumat bazası yaradılıb. Kadastr uçotu işləri nəticəsində bələdiyyələrin, dövlət torpaqlarının sərhədləri müəyyənləşdirilib, bu şəhər və rayonlar üzrə 71 inzibati ərazi dairəsinin xəritələri hazırlanaraq Milli Məclisə təqdim edilib.
Həmçinin Gəncə üzrə torpaqların elektron kadastr uçotu işlərinin nəticələri nümayiş olunub. Tədbirdə torpaq qanunvericiliyinin pozulması hallarının qarşısının alınması istiqamətində aidiyyəti dövlət orqanları ilə birgə fəaliyyətin genişləndirilməsi, ciddi tədbirlərin görülməsinin vacibliyi diqqətə çatdırılıb.
Müşavirədə şəhər və rayon icra hakimiyyəti, eləcə də digər dövlət orqanlarının nümayəndələri, bələdiyyə sədrləri torpaq və əmlak idarəçiliyi sahəsində qarşılaşdıqları məsələlərdən danışıblar.
Sonda iştirakçıların sualları cavablandırılıb, təklifləri dinlənilib.
