Gəncədə tələbələrlə görüş keçirilib. Bu haqda 4 noyabr tarixində ADAU-ya istinadən məlumat veririk.
Tanınmış marketoloq, "Mutfakçı" şirkətinin təsisçisi, iqtisad elmləri namizədi İlkin Manafov ADAU-da olub. Burada tələbələrin iştirakı ilə görüş baş tutub.
Tədbir Aqrobiznes və İdarəetmə fakültəsinin Marketinq kafedrasının təşkilatçılığı ilə keçirilib. Görüşdə qonaq “Müasir marketinq” mövzusunda çıxış edib. O, şəxsi brendin yaradılması və inkişafı yollarından, zamanın doğru dəyərləndirilməsinin vacibliyindən, işçini cəmiyyətə düzgün tanıdan və diqqət yetirilməli olan önəmli məqamlardan danışıb.
Marketoloq insanların öz markalarını yaratmalarında sosial şəbəkələrin əhəmiyyətini də vurğulayıb. Spiker son zamanların məşhur markaları haqqında tələbələrlə fikir mübadiləsi aparıb.
Görüşün sonunda gənclər marketinq sahəsində təcrübəyə cəlb edilməklə bağlı təkliflərini səsləndiriblər.
