Qazaxda məşqçilər və idmançılar güləş zalının halına görə alternativ axtarmağa məcbur olublar.
Gencexeber.az məlumat verir ki, Qazaxdakı Mərkəzi Stadionda qərb bölgəsinin ən böyük güləş zallarından biri yerləşir. Lakin hazırda idman ocağının fəaliyyət göstərməməsi yerli idmançılar üçün ciddi çətinliklər yaradır.
Məşq etmək imkanından məhrum olan məşqçilər və gənc güləşçilər lazımi şəraiti olmayan digər idman zallarına yollanmağa məcbur olurlar. Bu, həm məşq prosesinin səviyyəsinə, həm də idman nailiyyətlərinə mənfi təsir göstərir.
İdmançılar bununla əlaqədar olaraq, Güləş Federasiyasına və Qazax Rayon İcra Hakimiyyətinə müraciət edərək, mövcud vəziyyətə diqqət yetirilməsi və zalın işinin bərpası üçün lazımi tədbirlərin görülməsini xahiş edirlər. Onların sözlərinə görə, idman infrastrukturunun dəstəklənməsi idmançılarımızın milli və beynəlxalq arenalarda gələcək uğurlarının açarıdır.
