Gəncədə bəzi şadlıq saraylarının qarşısında park edilən avtomobillər qəza riskini artırır.
Gencexeber.az məlumat verir ki, belə hallardan biri şəhərin Üzeyir Hacıbəyov və Niyazi Əhmədov küçələrinin kəsişməsində yerləşən şadlıq sarayının qarşısında müşahidə olunur. Avtomobillərin iki cərgədə park edilməsi sürücülərdə narazılıq yaradır.
Vətəndaşların sözlərinə görə, sözügedən ərazidə park edilən avtomobillər Niyazi Əhmədov küçəsindən əsas yola çıxan sürücülərin görmə imkanlarını məhdudlaşdırır və qəza şəraiti yaradır. Şəhər sakinləri bu səbəbdən ərazidə tez-tez yol-nəqliyyat hadisələrinin baş verdiyini iddia edirlər.
Onların sözlərinə görə, problem demək olar ki, hər gün saat 17:00-dan sonra təkrarlanır.
Sürücülər aidiyyəti qurumlardan ərazidə parklanmanı qadağan edən yol nişanının qoyulmasını və ya işıqforun quraşdırılmasını xahiş edirlər.
