Gəncədə yağış sularının mənzilə dolması iki azyaşlı uşağı olan ailəni çətin vəziyyətdə qoyub.
Gencexeber.az-a daxil olan şikayətə görə, hadisə şəhərin Atatürk prospekti, 238B ünvanında yerləşən binanın 8-ci mənzilində qeydə alınıb. Rütubətli evdə yaşamağa məcbur qaldığını bildirən sakin Gəncə Şəhər İcra Hakimiyyətinə dəfələrlə müraciət etməsinə baxmayaraq, problemin həll olunmadığını iddia edir.
Vətəndaşın sözlərinə görə, hər dəfə yağış yağanda evini su basır. Nəticədə mənzilin tavanı saralıb, divar kağızları və boya örtüyü qopub. Şikayətçi bildirir ki, müraciətlərindən sonra qurum tərəfindən binaya işçilər göndərilib. Onlar problemin yağış suyu borusunun (novdanın) tutulması ilə əlaqədar olduğunu bildirərək təmizlik işləri aparıblar. Lakin buna baxmayaraq, yağış suları mənzilə dolmağa davam edir.
"İki balaca uşağım var. Bu rütubətin içində yaşayırıq. Hər dəfə yağış yağanda mən şikayət edib novdanı təmizlətdirməliyəm? Bu yaxınlarda gəlib təmizlədilər, amma yenə yağış yağanda evimə su dolur", – sakin narazılığını ifadə edib.
Şikayətçi problemin müvəqqəti deyil, birdəfəlik həll olunmasını və aidiyyəti qurumların məsələ ilə bağlı tədbir görməsini tələb edir.
Qeyd edək ki, məsələ ilə bağlı redaksiyamız tərəfindən Gəncə Şəhər İcra Hakimiyyətinə sorğu ünvanlanıb.
