Gəncədə yaşayış binalarının yaxınlığında zibil poliqonu kimi istifadə edildiyi iddia olunan ərazidə təmizlik işləri aparılıb.
Gencexeber.az-a Mənzil Kommunal Təsərrüfatı İstehsalat Birliyindən (MKTİB) verilən məlumata görə, Şah İsmayıl Xətai prospekti, 298 ünvanında yerləşən 5 və 6-cı binaların arxasında yığılıb qalan tullantılar texnika və işçi qüvvəsi vasitəsilə daşınıb. Konteynerlərin və yaşayış binalarının ətrafında səliqə-sahman yaradılıb.
Qurumdan bildirilib ki, sakinlərin zibil maşınlarının hər səhər həmin əraziyə tullantı boşaltması və ərazinin poliqona çevrilməsi ilə bağlı iddiaları əsassızdır. Açıqlamaya görə, ərazidə dəfələrlə təmizlik işləri aparılsa da, bəzi sakinlər tərəfindən yenidən çirkləndirilir.
Qurum şəhər sakinlərini məişət tullantılarını yalnız müəyyən edilmiş yerlərə atmağa və ətraf mühitin təmizliyini qorumağa çağırıb.
Qeyd edək ki, bundan öncə sakinlər sözügedən əraziyə MKTİB-nin zibil maşınları vasitəsilə tullantıların boşaldıldığını iddia ediblər.
