25 yaşlı oğlan həmkəndlisini bıçaqlayıb.
Hadisə Şəmkir rayonunun Əliyaqublu kəndində baş verib. 2001-ci il təvəllüdlü Cavid yaşadığı evin yerləşdiyi küçədə mobil telefonla danışaraq ünvansız söyüşlər söyüb. Bu zaman oradan keçən Emin təhqirlərin ona ünvanladığını zənn edib. Yaranan mübahisə zamanı Cavid meyvə doğramaq üçün istifadə etdiyi bıçağı çıxararaq bir dəfə Eminin sol böyrək nahiyəsinə vurub.
Cavidin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Cavid ona elan olunmuş ittiham üzrə özünü təqsirli bilib. O, ifadəsində göstərib ki, evdə olan zaman spirtli içki olan "GO" içib. Daha sonra siqaret çəkmək məqsədilə yaşadığı evin qarşısında mobil telefonla oynamağa başlayıb: "Həmin vaxt Emin küçədən keçərək əli ilə mənə salam verdi. Mən isə əsəbi olduğum üçün ünvansız söyüşlər söydüm.
Bu zaman Emin mənə yaxınlaşdı və kimə söyüş söydüyümü soruşdu. Eminə heç kimə söyüş söymədiyimi bildirdim. Lakin Emin mənimlə mübahisə etməyə davam etdi. Mübahisə zamanı əynimdə olan qış gödəkçəsinin sağ yan cibindən meyvə doğramaq üçün istifadə olunan bıçağı çıxararaq bir dəfə Eminin sol böyrək nahiyəsinə vurdum, ona xəsarət yetirdim".
İş üzrə zərərçəkmiş Emin ifadəsində təqsirləndirilən şəxslə barışdığını, ondan heç bir şikayət və tələbinin olmadığını deyib.
Şəmkir Rayon Məhkəməsinin hökmü ilə Cavid 9 ay müddətinə azadlığın məhdudlaşdırılması cəzasına məhkum olunub.
Mənbə: demokrat.аz
