Goranboyda bıçaqlanma olub.
Hadisə Sarov kəndində yerləşən "Komfort" çay evində qeydə alınıb.
İttiham aktına görə, 23 yaşlı Şükür İsayev (şərti adla) obyektdə tanışı və bir xanımla oturarkən mahnı sifarişi üstündə digər masada əyləşən müştəri ilə dava edib. Belə ki, əvvəlcə yan masada əyləşənlər "Goranboy" mahnısı sifariş edib oynayıblar.
Bu zaman Şükürün tanışı "Gəncə" mahnısı ifa etdirib və oynamağa başlayıb. Sonra yenidən yan masadakı qonaqlar "Goranboy" mahnısı sifariş ediblər. Bundan sonra yan masada əyləşənlərdən biri Şükürün dostu ilə mübahisə edib. Bu zaman Şükür üzərindəki bıçaqla həmin şəxsi bıçaqlayıb.
Fakt əsasında Ş.İsayev polis əməkdaşları tərəfindən saxlanılıb və barəsində cinayət işi açılıb.
Təqsirləndirilən şəxs ifadəsində əməlindən peşman olduğunu deyib.
Zərərçəkən şəxs isə təqsirləndirilən şəxslə barışdığını və ona qarşı şikayətinin olmadığını bildirib.
Məhkəmənin qərarı ilə Ş.İsayev 2 il 6 ay müddətinə azadlıqdan məhrum edilib.
Mənbə:lent.аz
