Gəncə Ağsaqqallar Şurasının illik hesabat yığıncağı keçirilib.
Gencexeber.az məlumat verir ki, tədbirdə Gəncə Şəhər İcra Hakimiyyəti başçısının birinci müavini Səməd Tomuyev, Azərbaycan Ağsaqqallar Şurasının sədr müavini Bayram Yusifov, Gəncə Ağsaqqallar Şurasının sədri, professor Nurəddin Məmmədov, Şuranın üzvləri və digər qonaqlar iştirak ediblər.
Əvvəlcə tədbir iştirakçıları Ulu Öndər Heydər Əliyevin abidəsini ziyarət edərək önünə gül dəstələri qoyublar.
Daha sonra Ulu Öndər Heydər Əliyevin, həmçinin Azərbaycanın ərazi bütövlüyü və suverenliyi uğrunda canından keçmiş şəhidlərin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Gəncə Şəhər İcra Hakimiyyəti başçısının birinci müavini Səməd Tomuyev çıxış edərək ağsaqqalların cəmiyyət həyatında, milli-mənəvi dəyərlərin qorunmasında və müxtəlif nəsillər arasında əlaqələrin möhkəmləndirilməsində mühüm rolundan bəhs edib.
Sonra Gəncə Şəhər Ağsaqqallar Şurasının hesabat məruzəsi dinlənilib. Qeyd olunub ki, hesabat dövründə gənclərin maarifləndirilməsi, milli-mənəvi dəyərlərin təbliği, şəhid ailələri və qazilərlə, eləcə də təhsil müəssisələrində tələbə və şagirdlərlə görüşlər keçirilib. Həmçinin şəhərdə mövcud olan bir sıra məsələlərlə bağlı təşəbbüs və təkliflər irəli sürülüb.
Tədbirin davamında Ağsaqqalların cəmiyyət həyatındakı rolundan danışılıb, onların ictimai fəallığının daha da artırılmasının vacibliyini vurğulanıb.
Konfransda, Azərbaycan Ağsaqqallar Şurasının sədri, professor Eldar Quliyevin 75 illik yubileyi münasibətilə Gəncə şəhəri də daxil olmaqla 12 şəhər və rayon təşkilatı tərəfindən hazırlanmış birgə təbrik ünvanı Bayram Yusifova təqdim edilib.
Sonda Gəncə Şəhər Ağsaqqallar Şurasının fəaliyyətində fərqlənən bir qrup şəxs "Təşəkkürnamə" ilə təltif edilib.
