Ağstafa rayonunda 35 yaşlı kişi həmkəndlisinə ağır xəsarət yetirib.
Hadisə Ağstafa Dəmiryol Vağzalının peronunda yerləşən sanitar qovşağının yaxınlığında baş verib. 1991-ci il təvəllüdlü Namiq aralarında olan borc mübahisəsi zamanı bıçaqla Kənan Aşurovun döş qəfəsindən vurub.
İş üzrə izahat verən Namiq bildirib ki, əvvəllər aralarında heç bir mübahisə olmayıb:
"Mübahisələrimiz pul məsələsinə görə yaranıb. Kənanın deməsinə görə, guya ki, mənim onun qardaşına 300 manat borcum olub. Lakin Kənanın qardaşından pul almamışam. Dəmiryol vağzalının ərazisində Kənanla təsadüfən görüşdüm. Kənan məni yumruqla vurduğu üçün üzərimdə olan bıçaqla onu qorxutmaq üçün qoluna vurmaq istədim. Lakin bıçaq onun sinəsinə dəydi. Hadisədən bir gün sonra Kənanla aramızda barışıq olub. Hazırda Kənan vəfat etdiyi üçün onun hüquqi varisi olan atasından üzr istəyirəm. Əməlimdən peşmanam və zərərçəkmiş şəxsin hüquqi varisindən üzr istəmişəm".
Zərərçəkmiş Kənanın hüquqi varisi, atası İbarət Aşırov deyib ki, təqsirləndirilən şəxs ondan üzr istəməyib:
"Buna baxmayaraq, təqsirləndirilən şəxsi anasına görə bağışlayıram. Onun həbs olunmasını istəmirəm".
Ağstafa Rayon Məhkəməsinin hökmü ilə Namiq 1 il 8 ay 27 gün müddətinə azadlıqdan məhrum edilib.
Mənbə: demokrat.аz
