Gəncədə Xan bağı və Azərbaycan Dövlət Aqrar Universitetinin Atatürk prospektində yerləşən filialının qarşısında sürücülər üçün təhlükəli vəziyyət yaranıb.
Gencexeber.az-a müraciət edən vətəndaşların sözlərinə görə, avtomobil yolunun tamet daşları ilə döşənmiş hissəsindən asfalta keçid olan ərazidə dərinliyi təxminən 10 santimetr olan çuxur mövcuddur.
Sürücülər bildirirlər ki, kənardan o qədər də böyük görünməyən çuxura avtomobillərin düşməsi nəticəsində asqı sisteminə qəfil və güclü zərbə dəyir. Habelə axşam saatlarında avtomobillərin şinlərinin partladığı, hətta təkər disklərinin deformasiyaya uğrayaraq əyildiyi qeyd olunur.
Narazı şəxslər problemin artıq aylardır həll olunmadığını qeyd edirlər. Vətəndaşlar aidiyyəti qurumlardan ərazidəki problemin qısa müddətdə aradan qaldırılmasını istəyirlər.
