Gəncə-Daşkəsən Regional Gənclər və İdman İdarəsinin təşkilatçılığı ilə Gəncə şəhərinin Xan Bağında növbəti "Səhər İdmanı" tədbiri keçirilib.
Gencexeber.az bildirir ki, tədbirdə regional İdarənin tabeliyində fəaliyyət göstərən Uşaq-Gənclər İdman Məktəbinin gimnastika bölməsinin yetirmələri məşqçi-müəllim Nurcahan Əliyevanın rəhbərliyi ilə iştirak ediblər.
Təşkil olunan səhər məşqi zamanı gimnastlar müxtəlif isinmə, çeviklik, elastiklik və koordinasiya hərəkətlərini yerinə yetirərək yüksək hazırlıq səviyyələrini nümayiş etdiriblər. Tədbir iştirakçılar arasında sağlam həyat tərzinin təbliği, fiziki fəallığın artırılması və idmana marağın daha da gücləndirilməsi məqsədi daşıyıb.
"Səhər İdmanı" müntəzəm fiziki aktivliyin təşviqinə, sağlam həyat tərzinin formalaşdırılmasına və günə enerjili başlanmasına töhfə verən tədbirlərdən biridir.
