Gəncə şəhərindəki Abbas Səhhət adına 1 nömrəli Şəhər Xəstəxanasının Poliklinika şöbəsində dava olub.
Belə ki, ötən ilin martın 19-da Gəncə şəhər sakini, 1999-cu il təvəllüdlü Elşad xəstəxananın Poliklinika şöbəsində yerləşən 220 nömrəli otaqda olarkən, tanımadığı Zakir adlı birinin həkim və tibb personalına etiraz etdiyini görüb. Elşad hadisəyə heç bir aidiyyəti olmadığı halda, mübahisəyə müdaxilə edib və Zakirin sifətinə yumruq vurub.
Daha sonra Zakir kömək istəmək üçün otaqdan çıxaraq qaçmağa başlayıb. Elşad onu pilləkəndə saxlayıb, bıçağın tiyəsi və əli ilə zərbələr endirib.
Bundan başqa, Elşad istintaqa dəqiq məlum olmayan vaxtda və mənbədən satış məqsədilə külli miqdarda, ümumi təmiz çəkisi 3,297 qram olan kustar üsulla hazırlanmış psixotrop maddə metamfetamini qanunsuz olaraq əldə edib. Gəncə Şəhər Baş Polis İdarəsinin Cinayət-Axtarış İdarəsi əməkdaşlarının həyata keçirdikləri əməliyyat-axtarış tədbirləri nəticəsində o, saxlanılıb.
Elşada Cinayət Məcəlləsinin 221.3-cü və 234.4.3-cü maddələri ilə ittiham elan olunub.
İş üzrə ifadə verən Elşad ittiham üzrə özünü təqsirli bilməyib. O, yalnız Cinayət Məcəlləsinin 128-ci (qəsdən sağlamlığa zərər vurma) maddəsi ilə özünü təqsirli hesab edib.
Cinayət işinə Gəncə Ağır Cinayətlər Məhkəməsində baxılıb.
Məhkəmənin hökmü ilə Elşad 3 il 5 ay 28 gün müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyənləşdirilib. Həmçinin təqsirləndirilən şəxsin ərazi narkoloji kabinetində qeydiyyata alınmasına qərar verilib.
