Azərbaycanda fantastik qiymətə qədim samovar satışa çıxarılıb.
Gencexeber.az məlumat verir ki, elan saytlarında yerləşdirilən məlumatda samovarın tarixinin Gəncə ilə bağlı olduğu qeyd edilib. İddiaya görə, nadir eksponat 1880-ci illərin əvvəllərində Gəncə şəhərində çar Rusiyası generallarından biri tərəfindən samovarı satan şəxsin babasına qiymətli hədiyyə kimi təqdim olunub.
Bildirilib ki, 1870-ci illərdə indiki Rusiya Federasiyasının Tula şəhərində Bataşev Zavodu tərəfindən istehsal olunan samovarın üzərində istehsalçı möhürü və 23 ədəd orijinal medal damğası mövcuddur. Əntiq əşya misdən hazırlanıb və kolleksiyaçılar üçün nadir nümunələrdən hesab olunur.
Elan sahibinin təqdim etdiyi məlumata əsasən, samovar hazırda 40 min manata satışa təklif edilir. Bu məbləğ isə bir çox minik avtomobilinin qiyməti ilə müqayisə olunur.
Qeyd edək ki, son illərdə Azərbaycanda qədim samovarların yüksək məbləğlərə satışa çıxarılması halları dəfələrlə müşahidə olunub. Daha əvvəl 100 min və hətta 200 min manata təklif edilən antik samovarlarla bağlı elanlar da yayılmışdı.
