Gəncənin Şah Abbas məscidi və ya Cümə məscidi 1606-cı ildə Səfəvi hökmdarı I Şah Abbasın əmri ilə memar Şeyx Bahəddin Məhəmməd Amilin layihəsi əsasında inşa edilib. Gəncədə yerləşən orta əsr abidələri içərisində memarlıq quruluşuna görə diqqətçəkən Gəncə Şah Abbas məscidi yerli və xarici turistlər tərəfindən maraqla qarşılanır.
AZƏRTAC xəbər verir ki, məscidin palıddan düzəldilmiş minbərinin üstündəki oyma bəzəklər Azərbaycan şəbəkəçilik sənətinin nadir nümunələrindəndir.
Məscid binasının giriş tağındakı qapının üstündə biri ərəb, digəri fars dilində olan iki daş kitabə bu günədək qorunub saxlanılır.
Dövlət tərəfindən qorunan Şah Abbas məscidi müxtəlif vaxtlarda bir neçə dəfə əsaslı təmir olunub və restavrasiya edilib.
