Gəncənin Poçt qəsəbəsində yerləşən restoran qarşısında baş verən kütləvi dava zamanı həyatını itirən 43 yaşlı Azər Yusifov hadisənin iştirakçısı olmayıb.
Gencexeber.az-ın əldə etdiyi məlumata görə, mərhum restoranda öz tanışları ilə ayrı masada əyləşib. Mübahisə edən şəxslər isə digər iki masada olublar. Onlar arasında başlayan mübahisə əvvəlcə restoran daxilində yaşanıb. Daha sonra gənclər obyektdən çölə çıxıblar.
İlkin məlumata əsasən, gənclərin arxası ilə yollanan və onları ayırmağa çalışan Azər Yusifov bu zaman bıçaq xəsarəti alaraq həyatını itirib.
Qeyd edək ki, hadisə zamanı 1998-ci il təvəllüdlü Azamat Peçerskiy, 1998-ci il təvəllüdlü Tural İlyasov və 1995-ci il təvəllüdlü Rahib Bayramlı müxtəlif dərəcəli bədən xəsarətləri alıblar. Yaralılar xəstəxanaya çatdırılıblar.
Polis əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən 2006-cı il təvəllüdlü Mirad Məmmədzadə saxlanılaraq istintaqa təhvil verilib.
Faktla bağlı Gəncə Şəhər Prokurorluğu və Gəncə Şəhər Baş Polis İdarəsində araşdırma aparılır.
