Xəbər verdiyimiz kimi, şəhərin Poçt qəsəbəsində yerləşən restoranlardan birinin qarşısında baş verən kütləvi dava zamanı 1983-cü il təvəllüdlü Azər Yusifov bıçaq xəsarəti alaraq həyatını itirib.
Gencexeber.az mərhumun əldə etdiyi fotosunu təqdim edir.
10:18
Gəncədə restorandakı kütləvi davada yaralananların vəziyyəti açıqlanıb.
Gencexeber.az-ın sorğusuna cavab olaraq Tibbi Ərazi Bölmələrini İdarəetmə Birliyindən bildirilib ki, avqustun 6-da saat 04:30-da xəsarət alması səbəbi ilə üç nəfər (kişi) Gəncə Şəhər Birləşmiş Xəstəxanasının nəzdində olan Abbas Səhhət adına xəstəxananın Təcili tibbi yardım şöbəsinə hospitalizasiya olunub.
"Müxtəlif bədən xəsarətləri alan şəxslərə zəruri tibbi xidmətlər göstərilib. Vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar", - məlumatda bildirilir.
09:03
Gəncədə baş verən kütləvi dava ölümlə nəticələnib.
Gencexeber.az-ın məlumatına görə, hadisə şəhərin Poçt qəsəbəsində yerləşən restoranlardan birinin qarşısında qeydə alınıb. İlkin məlumata görə, bir neçə nəfər arasında yaranan mübahisə sonradan kütləvi davaya çevrilib.
Dava zamanı 1983-cü il təvəllüdlü Azər Yusifov bıçaq xəsarəti alaraq həyatını itirib.
Hadisə nəticəsində 1998-ci il təvəllüdlü Azmat Peçerskiy, 1998-ci il təvəllüdlü Tural İlyasov və 1995-ci il təvəllüdlü Rahib Bayramlı müxtəlif dərəcəli bədən xəsarətləri alıblar. Yaralılar tibbi yardım göstərilməsi üçün xəstəxanaya çatdırılıb.
Polis əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən 2006-cı il təvəllüdlü Mirad Məmmədzadə saxlanılaraq istintaqa təhvil verilib.
Hadisənin hansı səbəbdən baş verdiyi hələlik məlum deyil. Faktla bağlı Gəncə Şəhər Prokurorluğu və Gəncə Şəhər Baş Polis İdarəsində araşdırma aparılır.
