Gəncənin səhiyyə sistemində böyük iz qoymuş, mərdliyi və peşəkarlığı ilə tanınan Nizami Rəşid oğlu Həmidov 74 yaşında dünyasını dəyişib.
Gencexeber.az-ın məlumatına görə, Nizami Həmidov 1951-ci ilin 16 martında Gəncə şəhərində anadan olub. Onun adı həm həkimlik fəaliyyəti, həm də dürüst xarakteri ilə yaddaşlarda qalacaq. Peşəkar həyatına 1978-ci ildə Gəncə Təcili Tibbi Yardım Stansiyasının baş həkimi kimi başlayan mərhum, daha sonra 1984-cü ildə Gəncə Səhiyyə İdarəsində müdir müavini vəzifəsini icra edib. 1985-ci ildə isə o, Gəncədən deputat seçilərək ictimai fəaliyyətə də töhfə verib.
Uzun illər Yeni Gəncə Diaqnostika Mərkəzində baş həkim kimi çalışan Nizami həkim, müxtəlif klinikalarda minlərlə vətəndaşın sağlamlığına qovuşmasına səbəb olub. O, aztəminatlı insanlara xüsusi qayğısı, Hipokrat andına sadiqliyi və yüksək savadı ilə seçilirdi. Gəncə ictimaiyyəti arasında onu “imkansızların dostu” adlandırırdılar.
Nizami Həmidovun ailəsi də ölkənin tarixində öz izini qoyub. Belə ki, onun yaxın qohumu 1925-ci ildə ermənilər tərəfindən gecə saatlarında evlərindən aparıldıqdan sonra itkin düşüb. Digər qohumu isə o dövrdə Məmməd Əmin Rəsulzadə ilə birlikdə Türkiyəyə mühacirət edib.
Nizami Həmidovun əməlləri və xatirəsi uzun illər hörmətlə yad ediləcək.
