Gəncədə 31 yaşlı Eyyub Talıbovun ölümü ilə bağlı həkim açıqlama verib.
Gəncə Şəhər Birləşmiş Xəstəxanasının cərrahı Bəxtiyar Əliyev Gencexeber.az-a bildirib ki, mərhum xəstəxanaya gətirilərkən çox qan itirib.
"Bizə bir vətəndaş daxil olub. Talıbov Eyyub Əli oğlu. Döş qəfəsinin sağ tərəfinin daxilə keçmiş, kəsilmiş-deşilmiş yarası, kəskin qan itirmə, şok dərəcədə olub. Təxirəsalınmaz şəkildə əməliyyata götürdük. Əməliyyat zamanı vəziyyəti ağır olduğu və qan itirdiyi üçün əməliyyat masasında ölüb", - B.Əliyev deyib.
Məlumat üçün bildirək ki, keçirilən əməliyyat tədbirləri ilə hadisəni törətməkdə şübhəli bilinən Alim Quliyev saxlanılıb.
09:29
Gəncədə 30 yaşlı kişini qətlə yetirən və 29 yaşlı şəxsi bıçaqlayan A.Quliyev saxlanılıb.
Gencexeber.az-ın məlumatına əsasən, polis əməkdaşlarının keçirdikləri müvafiq tədbirlər nəticəsində Eyyub Talıbovu bıçaqla qətlə yetirən 29 yaşlı Alim Quliyev saxlanılaraq istintaqa təhvil verilib.
19:40
Gəncədə bıçaqlanan şəxslərdən biri xəstəxanada vəfat edib.
Gencexeber.az-ın məlumatına görə, həkimlərin səylərinə baxmayaraq 1995-ci il təvəllüdlü Eyyub Talıbovu xilas etmək mümkün olmayıb.
19:33
Gəncədə bıçaqlanan şəxslərin kimlikləri məlum olub.
Gencexeber.az-ın məlumatına görə, 1995-ci il təvəllüdlü Eyyub Talıbov və 1994-cü il təvəllüdlü Osman Nağıyev bıçaq xəsarəti ilə xəstəxanalardan birinə yerləşdiriliblər.
Qeyd edək ki, hadisənin səbəbi və kim tərəfindən törədilməsi hələlik məlum deyil.
Faktla bağlı araşdırmalar davam etdirilir.
19:02
Gəncədə bıçaqlanma hadisəsi olub.
Gencexeber.az-ın məlumatına görə, hadisə şəhərin Atatürk prospektində qeydə alınıb. İlkin məlumata görə, iki nəfər bıçaqlanıb.
Həmin şəxslərin kimliyi və hadisənin təfərrüatları dəqiqləşdirilir.
