Gəncə şəhərində iki məktəbin yaxınlığında piyadaların təhlükəsizliyi ilə bağlı problemlər müşahidə olunur.
Gencexeber.az-a daxil olan şikayətə görə, Nəriman Nərimanov prospektində, Gəncə şəhər 30 nömrəli tam orta məktəbin yaxınlığında piyadaların təhlükəsiz hərəkətini təmin etmək məqsədilə yolda xətlənmə işləri görülüb. Lakin uzun müddət keçməsinə baxmayaraq, ərazidə zəruri yol nişanları quraşdırılmayıb.
Bu vəziyyətin sürücülərin diqqətsizliyinə və sürət həddinə əməl etməməsinə səbəb olduğu bildirilir. Nəticədə məktəbə gedib-gələn piyadaların, xüsusilə şagirdlərin təhlükəsizliyi risk altında qalır.
Digər problem isə Gəncə şəhər 20 nömrəli tam orta məktəbin yaxınlığında müşahidə edilir. Burada səkinin üzərində yerləşən kanalizasiya quyusunun ətrafındakı örtük dağılıb, dərin çökəklik və dəliklər yaranıb ki, bu da piyadalar üçün ciddi təhlükə yaradır.
Şikayətçilər aidiyyəti qurumlara müraciət edərək problemlərin bədbəxt hadisə baş verməmişdən əvvəl aradan qaldırılmasını tələb edirlər.
