Gəncədə qəsdən adam öldürmə və qəsdən adam öldürməyə cəhddə təqsirləndirilən Rəşad Abbasovun barəsindəki qərardan yenidən kassasiya şikayəti verilib.
İttihama görə, hadisə 21 noyabr 2024-cü il tarixdə, saat 21:00 radələrində Gəncə şəhərində qeydə alınıb. Belə ki, Rəşad Abbasov zərərçəkmişlər - anası, dayısı, dayısı arvadı, qardaşı və onun arvadını ailəsinin dağılmasında, yaranmış problemin həllinə laqeyd yanaşmaqda, xüsusilə də həyat yoldaşı ilə münasibətlərinin bərpası istiqamətində hər hansı dəstək və vasitəçilik göstərməməkdə günahlandırıb.
Rəşad dayısı Elyar Hüseynov və dayısı arvadı Ulduz Hüseynovanı qəsdən öldürmək niyyəti ilə yaşadıqları ünvana gedərək evin mətbəx otağına daxil olub. O, orada hər iki şəxsi bıçaqlayıb. Ulduz Hüseynova müalicə aldığı xəstəxanada ölüb.
Bununla da Rəşad Abbasov xüsusi amansızlıqla qadını qəsdən həyatdan məhrum etməklə öldürüb, iki şəxsi qəsdən öldürməyə cəhd edib, iki şəxsdən daha çox şəxsi, yəni üç nəfəri qəsdən öldürməyə hazırlıq edib.
Gəncə Ağır Cinayətlər Məhkəməsinin hökmü ilə o, 19 il müddətinə azadlıqdan məhrum edilib. Hökmdə qeyd edilib ki, təqsirləndirilən şəxs cəzasının ilk 3 ilini həbsxanada, qalan hissəsini isə ciddi rejimli cəzaçəkmə müəssisəsində çəkəcək. Apellyasiya şikayəti isə təmin edilməyib.
Sonuncu şikayət isə Ali Məhkəmənin hakimi İlkin Rəcəbovun sədrliyi ilə araşdırılacaq.
Mənbə: pravda.аz
