Ötən il Gəncənin ictimai nəqliyyat sistemində avtobus parkının yenilənməsi vətəndaşlar tərəfindən müsbət qarşılandı. Lakin şəhərdə avtobus dayanacaqları ilə bağlı mövcud vəziyyət hələ də aktuallığını qoruyur.
Gencexeber.az-a daxil olan çoxsaylı şikayətlərə görə, bəzi dayanacaqlar arasında məsafənin həddindən artıq uzaq olması, bir sıra ərazilərdə isə dayanacaqların ümumiyyətlə mövcud olmaması sərnişinlərin gediş-gəlişini çətinləşdirir.
Bundan başqa, şəhərin nəqliyyat xəritəsində 100-dən çox dayanacaq məntəqəsi göstərilsə də, onların bir çoxunda pavilyonların quraşdırılmadığı bildirilir. Bu isə xüsusilə yağışlı və isti havalarda vətəndaşların ciddi narahatlığına səbəb olur.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, Gəncə şəhərində dayanacaq məntəqələri Dövlət Şəhərsalma Norma və Qaydalarının tələblərinə uyğun olaraq, sərnişin tələbatı və səki şəraiti nəzərə alınmaqla quraşdırılıb.
Dayanacaqların pavilyonlarla təmin olunmasına gəlincə, AYNA-dan qeyd edilib ki, pavilyonlar infrastruktur şəraiti nəzərə alınmaqla quraşdırılır.
Beləliklə, Gəncədə yeni avtobusların istifadəyə verilməsi ilə ictimai nəqliyyatda əsas problemlərdən biri aradan qaldırılsa da, dayanacaqların yerləşməsi və pavilyonlarla təminatı məsələsi hələ də şəhər sakinlərinin gündəmindədir.
