Gəncə şəhəri 1 nömrəli Uşaq-Gənclər İdman-Şahmat Məktəbinin yeni binasının tikintisi 6 ildir başa çatdırılmır.
Gencexeber.az məlumat verir ki, məktəbin əvvəlki binasının açılışı 1980-ci ildə ulu öndər Heydər Əliyev tərəfindən həyata keçirilib. Həmin vaxtdan sonra təhsil ocağında əsaslı təmir işləri aparılmayıb.
2020-ci ildə məktəbin inzibati binası, idman zalları və üzgüçülük kompleksi tamamilə sökülüb və ərazidə yeni tikililərin inşasına başlanılıb. Lakin üstündən 6 il keçməsinə baxmayaraq, işlər hələ də yekunlaşdırılmayıb.
Hazırda məktəbin direktoru və digər əməkdaşları Gəncə şəhər Sənaye və Texnologiyalar üzrə Peşə Məktəbinin inzibati binasında fəaliyyət göstərirlər. İdman müəllimləri isə məşqləri orta məktəblərin idman zallarında və digər uyğunlaşdırılmış məkanlarda, qarşılıqlı razılaşma əsasında davam etdirirlər.
Ümumi ərazisi 6 hektardan çox olan məktəbdə hazırda 15 idman növü üzrə məşğələlər keçirilir. Binanın istismara verilməsindən sonra idman növlərinin sayının artırılması nəzərdə tutulur.
Qeyd edək ki, Gəncə şəhəri 1 nömrəli Uşaq-Gənclər İdman-Şahmat Məktəbi uzun illər ərzində Azərbaycan idmanına mühüm töhfələr verib. Məktəbin yetirmələri arasında "Şöhrət" ordenli idmançılar, dəfələrlə dünya və Avropa çempionatlarının qalibləri və mükafatçıları var.
Məktəbin yeni binasının tikintisinin nə zaman tam başa çatdırılacağı isə hələlik məlum deyil.
