Gəncə şəhərində son iki ayda 800 nəfər qrip virusu əleyhinə peyvənd olunub.
Gencexeber.az-a bu barədə Gəncə şəhər Birləşmiş Xəstəxanasının mətbuat Xidmətindən məlumat verilib.
Məlumata əsasən, payız-qış mövsümündə ölkə ərazisində kəskin respirator virus infeksiyalarının yayılmasının qarşısının alınması məqsədilə ənənəvi olaraq profilaktik və əksepidemik tədbirlər həyata keçirilir. Qrip əleyhinə inaktivləşdirilmiş vaksinlər mövsümi olaraq, xüsusilə qrip ağırlaşmalarının meydana çıxma riski yüksək olduğu hallarda uşaqların və böyüklərin qripdən qorunmasına kömək edir.
Qeyd olunub ki, peyvənd kampaniyası Gəncə Birləşmiş Xəstəxanasının nəzdində olan Kəpəz Ailə Sağlamlıq və Gülüstan Ailə Sağlamlıq Mərkəzlərində həyata keçirilir. Peyvənd böyüklərə və 6 aydan yuxarı olan uşaqlara təyin etmək üçün nəzərdə tutulub. Qrip əleyhinə peyvənd olunmaq könüllülük prinsipi əsasında aparılır.
