Bu gün Əməkdar artist Abbas Bağırovun 44 yaşı tamam olur.
Gencexeber.az xatırladır ki, Abbas Bağırov 29 avqust 1982-ci ildə Gəncə şəhərində ziyalı ailəsində anadan olub.
1988-ci ildə Gəncə şəhərində 34 nömrəli orta məktəbə daxil olub və eyni zamanda Gəncə şəhəri 2 nömrəli musiqi məktəbində fortepiano ixtisası üzrə Kamal Şirinovdan dərs alıb.1998-ci ildə məktəbi bitirib.
2000-2002-ci illərdə Tərtər rayonundakı Maliyyə-İqtisad kollecində təhsil alıb. 2002-ci ildən musiqi ilə ciddi məşğul olmaq üçün Bakı şəhərinə gəlib və vokal sənətini öyrənərək müxtəlif sənətkarlardan dərs alıb. 2002-ci ildən Azərbaycanın Əməkdar artisti Ənvər Sadıqov ilə çalışmağa başlayıb.
Gəncədə yaşayarkən uşaqlıq dostu olan pianoçu və aranjımançı Samir Şirinovla birgə çalışıb. 2003-2005-ci illərdə Bakı Musiqi Akademiyasının müəllimlərindən dərslər alıb.
ABŞ, Türkiyə, Rusiya, Fransa, İtaliya və digər Avropa ölkələrində təşkil olunan festivallarda Azərbaycanı təmsil edib.
2011-ci ildə Azərbaycan Respublikasının Prezidenti İlham Əliyevin imzaladığı Sərəncama əsasən Abbas Bağırov "Azərbaycan Respublikasının Əməkdar artisti" fəxri adına layiq görülüb.
