İyulun 19-da Daşkəsən Rayon İcra Hakimiyyətinin təşkilatçılığı, Kənd Təsərrüfatı Nazirliyi, Mədəniyyət Nazirliyi, Gənclər və İdman Nazirliyi, Elm və Təhsil Nazirliyi, “AzerGold” QSC-nin dəstəyi ilə Daşkəsən rayonunun yaradılmasının 95 illiyinə həsr olunan “Daşkəsən Kənd Təsərrüfatı Məhsulları Festivalı”, eyni zamanda, Aqrar İnnovasiya Mərkəzinin təşkil etdiyi “Aqrar Biznes Festivalı” Daşkəsən Gənclərin Təlim və İstirahət Mərkəzində böyük izdihamla reallaşıb.
Gencexeber.az bildirir ki, festivalda Daşkəsən Rayon İcra Hakimiyyətinin başçısı Orxan Abbasov, Azərbaycan Dövlət Aqrar Universitetinin rektoru Zəfər Qurbanov, Aqrar İnnovasiya Mərkəzinin direktoru Anar Cəfərov, Kənd Təsərrüfatı Nazirliyinin, Gənclər və İdman Nazirliyinin, Gəncə-Daşkəsən Regional Mədəniyyət İdarəsinin, “Daşkəsən Dəmir Filiz” MMC-nin məsul əməkdaşları, rayon ictimaiyyətinin nümayəndələri, şəhid ailələrinin üzvləri, qazilər, fermerlər, sahibkarlar, minlərlə rayon sakini və turistlər iştirak ediblər.
Ailə kəndli və fermer təsərrüfatlarının inkişafını təşviq etmək, yerli istehsalçıların məhsullarını tanıtmaq və ekoloji təmiz qida məhsullarını daha geniş kütləyə nümayiş etdirmək, həmçinin heyvandarlıq, arıçılıq, qurudulmuş və təzə dərman bitkiləri, dağ-meşə meyvələri, tərəvəz, ət və süd məhsulları, o cümlədən digər kənd təsərrüfatı sahələrinin inkişafına dəstək məqsədi daşıyan festivalda iştirakçılar birbaşa istehsalçılardan alış etmək imkanı əldə ediblər. Əl işlərindən ibarət sərgi-satış yarmarkası, habelə folklor çıxışları, “Dadlı Daşkəsən” guşəsində milli mətbəx nümunələrinin təqdimatı, uşaq və yeniyetmələr üçün əyləncə və idman proqramları rəğbətlə qarşılanıb.
Festival təntənəli konsert və atəşfəşanlıqla başa çatıb.
