Quldurluqda təqsirləndirilən Gəncə sakinlərinin şikayətini Bakı Apellyasiya Məhkəməsi təmin etməyib. Bu haqda 27 dekabr tarixində Oxu.az-a istinadən xəbər veririk.
Söhbət 1991-ci il təvəllüdlü Xəyal və 1986-cı il təvəllüdlü Tuqay Bayramov qardaşlarından gedir. Onların barəsində hökmdən kassasiya şikayəti verilib.
Adıçəkilən şəxslər 23 noyabr 2019-cu ildə 1964-cü il təvəllüdlü Adəm Abdullayevi amansızlıqla qətlə yetiriblər. Böyük qardaşın sözlərinə görə, hadisədən bir neçə gün əvvəl aralarında yaranan mübahisə zamanı Adəm onu təhqir edib. O, qardaşı Xəyala “bir nəfər var, atamızı söyüb, onu cəzalandırmaq lazımdır” deyib və cinayət hadisəsini həyata keçiriblər. Onlar bıçaqla həmin şəxsin bədəninin müxtəlif nahiyələrinə çoxsaylı zərbələr vurduqdan sonra cibindən mobil telefon, içərisində 1 000 manat pul və bank kartları olan pulqabısını götürüblər. Adəmi Nərimanov rayonunun Nurəddin Süleymanov küçəsi, 1 ünvanındakı boş əraziyə gətirərək, daha iki zərbə vurmaqla ölməsinə tam əmin olduqdan sonra törətdikləri cinayəti gizlətmək məqsədi ilə neft məhsulunu meyitin üzərinə töküb yandırıblar.
Məhkəmə qardaşları Cinayət Məcəlləsinin qabaqcadan əlbir olan bir qrup şəxs tərəfindən xüsusi amansızlıqla və quldurluqla qəsdən adam öldürmə və quldurluq, zərərçəkmiş şəxsin sağlamlığına ağır zərər vurulmaqla törədildikdə maddələri ilə təqsirli bilib. Bakı Ağır Cinayətlər Məhkəməsinin hökmü ilə Tuqay Bayramov 19, Xəyal Bayramov 18 il müddətinə azadlıqdan məhrum olunublar.
