Bu gün Azərbaycan Yazıçılar Birliyinin (AYB) Gəncə bölməsinin sabiq sədri, Əməkdar incəsənət xadimi Məmməd Alimin anım günüdür.
Gencexeber.az məlumat verir ki, Məmməd Alim 16 mart 1949-cu ildə Goranboy rayonunun Xınalı kəndində dünyaya gəlib. Şair 1989-cu ildən Azərbaycan Yazıçılar Birliyinin Gəncə bölməsinin sədri vəzifəsində çalışıb. Rəsul Rza mükafatı laureatı olan Məmməd Alimin 20-yə qədər kitabı işıq üzü görüb. Bundan başqa onun dünya ədəbiyyatından bir çox tərcümələri var.
İlk kitabı olan "Ürəyimin şəkli" 1979-cu ildə 30 yaşı olarkən dərc edilib. 2007-ci ildə onun haqqında "Yuva qurdum söz içində. Məmməd Alim" adlı sənədli film də çəkilib. Həmin ekran əsərində şairin bütün yaradıcılığı, şeirlərinin yaranma tarixçəsi öz əksini tapıb.
Məmməd Alim 29 avqust 2014-cü ildə Gəncədə dünyasını dəyişib. Gəncə şəhərinin Fəxri xiyabanında dəfn olunub.
Vəfatından sonra mərhumun həyat yoldaşı Tamella Məmmədova onun şeirlərindən ibarət – "Gəncədən doğan ulduz…" və "Dünya, qapını aç…" adlı iki kitab nəşr edib.
Ruhun şad olsun, Məmməd Alim!
