Şəmkir rayonunda ər-arvadın mübahisəsi cinayətlə nəticələnib.
Belə ki, 1972-ci il təvəllüdlü Firdovsi ailə-məişət zəminində yaranmış münaqişə zamanı yumruq və şillə zərbələri ilə həyat yoldaşı Suraya (adlar şərtidir – red.) xəsarətlər yetirib.
Faktla bağlı Firdovsi barəsində Cinayət Məcəlləsinin 128-ci maddəsi ilə ittiham elan edilib. İş üzrə izahat verən Firdovsi ona qarşı irəli sürülmüş ittihamda özünü tam təqsirli bilib.
"Barəmdə şikayət edən Sura həyat yoldaşımdır, amma 2025-ci ilin may ayından münasibətlərimiz pozulub. Bu səbəbdən həmin vaxtdan Sura ilə ayrı-ayrı otaqlarda yaşayırıq. Mən yemək və digər lazımi gündəlik ehtiyaclarımı özüm qarşılayıram. Məlum hadisə günü də bacım Nərminənin mənim üçün bişirdiyi yeməyi təhvil aldım və kəndə qayıtdım. Sura əlimdə olan yemək paketini gördü və bacımın mənə yemək bişirdiyini başa düşdü və əxlaqsız danışdı. Aramızda mübahisə yarandı və üzünə, başına yumruq vurdum. Əməlindən peşmanam və arvadımla barışmışam", - deyə təqsirkar bildirib.
İş üzrə zərərçəkmiş Suranın sözlərinə görə həyat yoldaşı ilə ayrı-ayrı otaqlarda yaşayırlar.
"Hadisə günü saat 15 radələrində Firdovsi evə gəldi və məndən mobil telefonumu istədi. Mən mobil telefonunu vermək istəmədim. O, mobil telefonumu stolun üzərindən götürdü və telefonla danışmağımı istəmədiyini bildirdi. Sonra da məni yumruq və şillə zərbələri ilə döyməyə başladı. Hadisədən sonra barışmışıq, hazırda ondan şikayət və tələbim yoxdur", - deyə zərərçəkmiş qeyd edib.
Şəmkir Rayon Məhkəməsinin hökmü ilə Cinayət Məcəlləsinin 73.2-ci maddəsi tətbiq edilməklə təqsirləndirilən şəxs cinayət məsuliyyətindən azad edilib, iş üzrə icraata xitam verilib.
Mənbə:demokrat.аz
