Avtozavod qəsəbəsinin Avtomobil Zavodunun qarşısında yerləşən Almaz Aşurov küçəsinin sakinləri uzun müddətdir küçə işıqlandırmasının olmamasından və elektrik enerjisinin təchizatından şikayətlənirlər.
Gencexeber.az-a müraciət edən vətəndaşların sözlərinə görə, axşam saatlarında ərazidə demək olar ki, göz-gözü görmür. Onlar bildirirlər ki, qaranlıq səbəbindən dəfələrlə təhlükəli hallar yaşanıb. Ahıl qadın daşa ilişərək yıxılıb və qolunu sındırıb. Digər sakinin uşağını isə küçədə it dişləyib.
Bundan əlavə, evlərə verilən elektrik enerjisində gərginliyin aşağı olduğu bildirilir. Sakinlərin sözlərinə görə, bəzi elektrik cihazları normal işləmir, televizor və soyuducuların xarab olması halları da olub. Habelə axşam saatlarında elektrik enerjisi tez-tez kəsilir.
Almaz Aşurov küçəsində yaşayanlar məsələ ilə bağlı dəfələrlə aidiyyəti üzrə müraciət etdiklərini, küçənin işıqlandırılması ilə bağlı isə icra hakimiyyətinə yazılı ərizə verdiklərini bildirirlər. Lakin onların sözlərinə görə, müraciətlərə baxılmayıb.
Sakinlər aidiyyəti qurumlardan həm küçənin işıqlandırılması, həm də elektrik şəbəkəsinin və transformatorun vəziyyətinin yoxlanılmasını, problemin aradan qaldırılmasını istəyirlər.
