Gəncədə daha bir müəssisədə nöqsanlar aşkarlanıb. Bu haqda 28 fevral tarixində Apa-ya istinadən məlumat veririk.
Şəhər Birləşmiş Xəstəxanasında aparılan audit zamanı toplanmış sübutlar ilə Xəstəxananın tabeliyində olan Ailə Sağlamlıq Mərkəzinin (ASM) Ailə həkimi terapevtləri tərəfindən bəzi hallarda vətəndaşlara öz ixtisaslarına uyğun olmayan dərmanlar təyin edildiyi üzə çıxıb.
Narkotik vasitələrin ehtiyatının tibb müəssisəsinin şöbələrində tələbat normalarına əməl edilməyib. Xəstəxananın Təcili Təxirəsalınmaz Tibbi Yardım Şöbəsinin aptek otağında saxlanılan narkotik vasitələrin miqdarı göstərilən tələbata uyğun olmayıb. Çağırışçı həkimlər tərəfindən tələbnamə əsasında götürülən narkotik vasitələr istifadə olunmadığı halda, növbənin dəyişməsi zamanı təhvil-təslim edilmədiyi, narkotik vasitələrin üzərində nəzarətin qanunvericiliyin tələblərinə uyğun təşkil olunmadığı müəyyənləşib.
