Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Vaqif Qayıbzadənin (adı, soyadı şərtidir) cinayət işi üzrə məhkəmə prosesi başa çatıb.
Pravda.аz xəbə verir ki, hakim Elşən Vəliyevin sədrliyi ilə keçirilən prosesdə hökm oxunub.
Məhkəmənin hökmü ilə o, 1 il müddətinə azadlıqdan məhrum edilib.
İttiham aktına görə, hadisə 2025-ci il aprelin 25-də, saat 02:40 radələrində Şəmkir rayonu ərazisində yerləşən evlərin birində qeydə alınıb.
Belə ki, 2004-cü il təvəllüdlü Vaqif Qayıbzadə evdə kənar şəxsin gizləndiyindən şübhələnib. Evi axtararkən o, anası ilə nikahdan kənar qeyri-rəsmi münasibətdə olan zərərçəkmiş Yaqub Babayevi (adı, soyadı şərtidir) yataq otağının dolabında görüb. Təqsirləndirilən şəxs onun evə oğurluq məqsədilə girdiyini güman edərək mətbəxdən götürdüyü bıçaqla hücum edib, sonra isə yumruq zərbələri ilə ona xəsarət yetirib.
Hadisədən sonra Vaqif Qayıbzadə saxlanılaraq cinayət məsuliyyətinə cəlb edilib.
