Azərbaycan ədəbiyyatının tanınmış nümayəndəsi, nasir, şair və tərcüməçi Vidadi Babanlının vəfatından bir il ötür.
Gencexeber.az məlumat verir ki, Vidadi Yusif oğlu Babanlı 1927-ci il yanvarın 5-də Qazax qəzasının Birinci Şıxlı kəndində müəllim ailəsində anadan olub. Orta məktəbi doğma kəndində bitirdikdən sonra 1944–1949-cu illərdə Azərbaycan Dövlət Universitetinin filologiya fakültəsində təhsil alıb.
Əmək fəaliyyətinə Sabirabad şəhər orta məktəbində müəllim kimi başlayan Vidadi Babanlı daha sonra Bakıya köçərək "Azərbaycan müəllimi" qəzetində çalışıb. O, "Ədəbiyyat qəzeti"nin redaksiyasında ədəbi işçi və şöbə müdiri, "Azərbaycan" jurnalında nəsr şöbəsinin rəhbəri, "Azərbaycanfilm" kinostudiyasında və "Yazıçı" nəşriyyatında müxtəlif vəzifələrdə işləyib.
Yazıçının ilk mətbu əsəri 1947-ci ildə "Azərbaycan gəncləri" qəzetində dərc olunan "Anam sən oldun" şeiri olub. İlk şeirlərini "Vidadi Şıxlı" təxəllüsü ilə çap etdirən müəllif 1954-cü ildən nəsr yaradıcılığı ilə məşğul olub.
Vidadi Babanlı yaradıcılığı ərzində roman, povest, hekayə, oçerk, publisistik məqalə və kinossenari yazıb. Onun "Gəlin", "Ana intiqamı", "Mənim gizlinlərim", "Dərd məni dilləndirir", "Kişilik haqqında himn" və digər əsərləri oxucular tərəfindən rəğbətlə qarşılanıb. Əsərləri SSRİ xalqlarının və xarici ölkələrin dillərinə tərcümə olunub.
Ədəbiyyat sahəsində uzunillik fəaliyyətinə görə Vidadi Babanlı 1986-cı ildə "Azərbaycan Respublikasının əməkdar incəsənət xadimi" fəxri adına layiq görülüb, 2002-ci ildə Prezidentin fərdi təqaüdünü alıb. 2022-ci ildə isə Azərbaycan ədəbiyyatının inkişafında xidmətlərinə görə "Şərəf" ordeni ilə təltif edilib.
Vidadi Babanlı 16 avqust 2025-ci ildə Bakıda vəfat edib. O, doğulduğu Qazax r Birinci Şıxlı kənd qəbiristanlığında dəfn olunub.
