“Kəpəz”in azarkeşi bıçaqlanıb. Bu haqda 1 fevral tarixində Report-a istinadən məlumat veririk.
Hadisə Premyer Liqanın “Səbail” - “Kəpəz” qarşılaşmasında final fitindən sonra matçın oynanıldığı "ASCO Arena"nın yaxınlığında baş verib. Əvvəlcə iki komandanın fanatları arasında mübahisə düşüb. Tərəflər məsələyə aydınlıq gətirmək üçün stadiondan kənara çıxıblar. Bu zaman "Səbail"in tərəfdarlarından biri bıçaqla "Kəpəz" fanatına xəsarət yetirib.
Qarın boşluğundan xəsarət alan Rahib adlı azarkeş dərhal 1 saylı Kliniki Tibbi Mərkəzə çatdırılıb. O, əməliyyat olunub.
Xəstəxanada "Kəpəz"in İdarə Heyətinin sədri İlqar Nadiri, millət vəkili Müşfiq Cəfərov, idman direktoru Mehman Allahverdiyev, baş məşqçi Tərlan Əhmədov və çoxlu sayda azarkeş zərərçəkmişi tək qoymayıblar.
Hadisə ilə bağlı cinayət işi açılıb.
