Bu gün tanınmış ictimai-siyasi xadimi Çingiz Sadıqovun (Dəmiroğlu) anım günüdür.
Gencexeber.az məlumat verir ki, Çingiz Dəmir oğlu Sadıqov 1944-cü ilin yanvarın 5-də Gəncədə dünyaya gəlib. O, orta təhsilini doğma şəhərdə alıb, 1968-ci ildə Kənd Təsərrüfatı İnstitutunu bitirib. Çingiz Dəmiroğlu 1971-ci ildə həmin ali təhsil ocağında aspiranturasını da bitirib, 1971-1973-cü illərdə elmi işçi işləyib.
Sadıqov 1973-1975-ci illərdə Xanlar (Göygöl) rayon Aqrar İstehsalat Birliyinin baş direktorunun müavini vəzifəsində çalışıb. 1975-1990-cı illərdə Xanlar rayon və Gəncə şəhər partiya komitələrində müxtəlif məsul vəzifələrində işləyib. 1990-1995-ci illərdə Sadıqov Azərbaycan Respublikası Milli Məclisinin deputatı və Gəncə şəhər Xalq Deputatları Məclisinin sədri olub.
2 fevral 1999-cu ildə Çingiz Sadıqovun rəhbərliyi ilə “Azərbaycan Tərəqqi Partiyası (ATP) təsis edilib və 2005-ci ildə rəsmi dövlət qeydiyyatına alınıb. Çingiz Dəmiroğlu iki dəfə (2003, 2008-ci illərdə) Azərbaycan Respublikası prezidentliyinə namizəd olub.
Çingiz Dəmiroğlu 25 yanvar 2015-ci ildə Bakı şəhərində vəfat edib. İctimai-siyasi xadim Gəncənin Fəxri xiyabanında dəfn edilib.
Cavid Şəmiyev
