Səlim Məşədi Əli oğlu Rəfiyev 1 iyul 1905-ci (1908) ildə Gəncədə anadan olub. O, Səlim Rəfiq Rəfioğlu kimi tanınıb. Ədəbiyyatşünas Gəncənin məşhur Rəfibəylilər ailəsinə mənsubdur.
İlk və orta təhsilini Gəncə şəhərində alıb. O, 1927-ci ildə Gəncə Pedaqoji Texnikumunu bitirib. Səlim bəy Müsavat Partiyasının gizli təşkilatının yardımı ilə əvvəlcə İrana gedib, orada əmisi, həkim Musa Rəfiyevin yanında qalıb, daha sonra Türkiyəyə mühacirət edib.
1930-1931-ci illərdə Rəfiyev İstanbul Universitetinə Ədəbiyyat fakültəsinə və Yüksək Müəllim Məktəbinə qəbul olub. Onun dissertasiya işi “Azərbaycan və Anadolu xalq hekayələrinin təhlili və müqayisəsi” mövzusunda olub.
Rəfioğlu pedaqoji fəaliyyətə 1934-cü ildə Antalya Liseyinə ədəbiyyat müəllimi kimi başlayıb. Həmçinin o, 1935-1962 illərdə Malatya Liseyində, Bursa Liseyində, Bursa 1-ci və 2-ci orta məktəblərində, İstanbul Kişi Liseyində, İstanbul Sultan Əhməd Kişi Sənət İnstitutunda müəllim işləyib. Bu vəzifədə etdiyi müraciətinə əsasən, Milli Təhsil Nazirliyi Müdirlər Komissiyasının qərarı ilə 1955-ci ildə bir illik Almaniyaya təcrübə keçməyə göndərilib. Səlim Rəfioğlu 1962-ci ildə təqaüdə çıxıb.
Rəfioğlu 3 kitabın müəllifidir: “Professor Dr. Çobanzadəyə cavab”, “Professor Dr. Əhməd Cəfəroğlunun əsərlərindəki xətalar”, “Azərbaycan ədəbiyyatı. Seçilmiş misralar”. Türkiyənin mətbu orqanlarında onun Azərbaycan mədəniyyətinə aid bir çox məqalələri çap olunub.
Səlim bəy alim kimi 1968-ci ildə Azərbaycana gəlib, Bakıda Nizami Gəncəvi adına Ədəbiyyat Muzeyində alimlər Həmid Araslı və Abbas Zamanovla görüşüb.
Səlim Rəfioğlu 4 aprel 1980-ci ildə İstanbulda vəfat edib.
Mənbələr:
- Ömər Özcan. Səlim Rəfiq Rəfioğlu. Bakı-2013.
- http://www.anl.az/down/meqale/525/2019/avqust/667748.htm
- http://www.anl.az/down/meqale/525/2019/iyul/667070.JPG
