Şəmkirin bir sıra ərazilərində təbii qazın verilişi hələ də bərpa olunmayıb.
Gencexeber.az-a daxil olan onlarla şikayətə görə, Şəmkir rayonunun Kür qəsəbəsi, Səməd Vurğun qəsəbəsi, Mahmudlu, Yeniabad, Xuluf, Qapanlı və Bayramlı kəndlərində təbii qazın verilişində fasilə yaranıb.
Buna səbəb "Azəriqaz" İstehsalat Birliyi tərəfindən diametri 1200/1020 mm olan "Qazməmməd–Qazax II xətti" və diametri 1020 mm olan "Qazax–Saquramo" magistral qaz kəmərlərində yeni çəkilmiş hissələrin mövcud kəmərlərə qoşulması ilə bağlı aparılan işlərdir.
Qurum tərəfindən sözügedən işlərin avqustun 5-dən 20-dək həyata keçiriləcəyi bildirilib.
Lakin ictimaiyyətə açıqlanan müddətin başa çatmasından iki gün keçməsinə baxmayaraq, adıçəkilən ərazilərdə qaz təchizatı hələ də bərpa edilməyib.
Sakinlər qazın nə vaxt veriləcəyi ilə bağlı dəqiq məlumatın açıqlanmasını gözləyirlər.
