Gəncədə yerləşən yeraltı keçidin vəziyyəti ilə bağlı şikayət edilib.
Gencexeber.az-a şikayətini bildirən əcnəbi tələbənin sözlərinə görə, Azərbaycan Texnologiya Universitetinin yaxınlığında yerləşən yeraltı keçid artıq uzun müddətdir baxımsız vəziyyətdədir. O bildirib ki, təxminən 2 ildir həmin keçidin bu vəziyyətdə olduğunu müşahidə edir.
Gəncin sözlərinə görə, ərazidə xoşagəlməz qoxular hiss olunur. Həmçinin keçidin işıqlandırılması işləmir, divarlar və tavan isə yararsız vəziyyətdədir.
Şikayətçi qeyd edib ki, yeraltı keçiddən yerli sakinlər, tələbələr və şəhərə gələn qonaqlar istifadə edir. O, tikilinin mövcud vəziyyətinin Gəncə haqqında mənfi təəssürat yaratdığını bildirib.
Əcnəbi tələbə aidiyyəti qurumları problemin həlli üçün tədbir görməyə və yeraltı keçidin təmir olunaraq normal vəziyyətə gətirilməsinə çağırıb.
