Gəncənin müxtəlif ərazilərində tullantıların yığılması ilə bağlı yayılan görüntülərdən sonra aidiyyəti qurum açıqlama verib.
Gencexeber.az-a Mənzil Kommunal Təsərrüfatı İstehsalat Birliyi (MKTİB) tərəfindən bildirib ki, şəhərin bir sıra ərazilərində mütəmadi olaraq təmizlik işləri aparılır, zibil konteynerləri yerləşdirilib və məişət tullantılarının gün ərzində daşınması təmin edilir.
Qurumdan əlavə edilib ki, aşağıda sadalanan ərazilərdə təmizlik aksiyaları keçirilib, tullantıların xüsusi texnikalar vasitəsilə daşınması təmin olunub:
– 14 nömrəli tam orta məktəbin qarşısı;
– 23 nömrəli tam orta məktəbin qarşısı;
– 44 nömrəli ingilis dili təmayüllü məktəb-liseyin ətrafı;
– Keçmiş Çəngəl-bıçaq zavodunun yaxınlığında yerləşən yeni məhəllələr;
– İ.Kazımov küçəsi;
– Gəncə Cihazqayırma zavodunun yaxınlığındakı yeni məhəllələr;
– Totanlı dairəsində Təcili və Təxirəsalınmaz Tibbi Yardım Stansiyasının qarşısı;
– Ozan küçəsində məscidin qarşısı;
– Şah İsmayıl Xətai prospektində Qoşa Şir heykəlinin ətrafı.
Qurum şəhərdə antisanitar vəziyyətin yaranmasının əsas səbəblərindən birinin bəzi sakinlərin tullantıları təyin olunmuş yerlərə deyil, konteynerlərin ətrafına və digər ərazilərə atması olduğunu qeyd edib. Bildirilib ki, bəzi hallarda konteynerlər boş olsa belə, zibillər onların kənarına atılır.
MKTİB sakinlərə müraciət edərək məişət, budama və təmir tullantılarının müəyyən olunmuş qaydalara uyğun şəkildə daşınmasının vacibliyini xatırladıb və şəhərin təmiz saxlanılmasına dəstək olmağa çağırıb.
