Gəncəli məzun beynəlxalq imtahanda yüksək nəticə göstərərək Türkiyədə 100 faiz təqaüdlə təhsil almaq imkanı qazanıb.
Gencexeber.az-ın məlumatına görə, Gəncə şəhər Fizika, Riyaziyyat və İnformatika təmayüllü liseyin məzunu Kənan Sadıxov Türkiyə Cümhuriyyəti universitetlərinə əcnəbi tələbələrin qəbulu üçün keçirilən YÖS (Xarici Tələbə İmtahanı) imtahanında 500 bal toplayaraq ən yüksək nəticəni göstərib.
Dünya birincisi olan gənc "Türkiye Bursları" proqramı çərçivəsində Xaricdə Yaşayan Türklər və Əqrəba Topluluqları Başqanlığı (YTB) tərəfindən 100 faiz təqaüdlə İstanbul Universiteti-Cerrahpaşanın Tibb fakültəsinin "Müalicə işi" ixtisasına qəbul olunub.
Kənan Sadıxov yüksək nəticələrinə görə əlavə təqaüd də qazanıb. O, təhsil müddətində aylıq 13 000 türk lirəsi məbləğində təqaüd alacaq.
