Gəncə Dövlət Dram Teatrının keçmiş binası XIX əsrin 80-ci illərində alman əsilli, Yelenendorfda (indiki Göygöl rayonu) şərab zavodlarının sahibi Xristofor Forer tərəfindən tikilib. Bu bina M.A.Abbaszadə küçəsi, 54 ünvanında yerləşir.
Gencexeber.az məlumat verir ki, Gəncəyə köçməmişdən əvvəl bu teatr XX əsrin əvvəllərində Bakıda yaradılıb. 13 noyabr 1921-ci ildə aktyor Hacıağa Abbasovun rəhbərliyi ilə "Azad Tənqid-Təbliğ Teatrı" kimi fəaliyyətə başlayıb. 1925-1927-ci illərdə "Bakı İşçi-Kəndli Teatrı" kimi, 1927-1932-ci illərdə "Bakı Türk İşçi Teatrı" kimi fəaliyyətini davam edib.
1932-ci ilin dekabr ayında bu teatrın yaradıcı kollektivi Gəncəyə köçürülürüb və "Qırmızı bayraqlı Türk işçi Teatrı" kimi fəaliyyətə başlayıb. Abbas Mirzə Şərifzadə, İsmayıl Talıblı, Ələsgər Ələkbərov, Ağasadıq Gəraybəyli, Ağahüseyn Cavadov, Kazım Ziya, Mehdi Məmmədov, Fatma Qədri, Əmir Dadaşlı, Rəmziyyə Veysəlova kimi sənət adamları Gəncəyə köçərək burada çalışıblar.
1934-1990-cı illərdə teatrın adı bir neçə dəfə dəyişdirilmişdir. 1990-cı ildən isə Gəncə Dövlət Dram Teatrı adlandırılmışdır. Gəncə Dövlət Dram teatrı Türkiyənin, Ukraynanın, Gürcüstanın şəhərlərində keçirilən teatr festivallarında iştirak edib.
Gəncə teatrının səhnəsində "Ölülər" (Cəlil Məmmədquluzadə), "Od gəlini" (C.Cabbarlı), "Aslan yatağı" (M. H. Təhmasib), "İntizar" (İ. Əfəndiyev və M. Hüseyn), "Bizim şəhərli oğlan"(K. Simonov), "İntiqam" (Z. Xəlil), "Müfəttiş" (Qoqol), "Nəsrəddin şah" (C. Cabbarlı), "Qoca" (M. Qorki), "III-Riçard" (V. Şekspir), "Antiqona" (Esxil) və s. tamaşalar nümayiş etdirilib.
Gəncə Dövlət Dram Teatrının 500 yerlik yeni binası Gəncəçayın sağ sahilində, Əhməd Cəmil küçəsində inşa edilib. Tikilinin təməli 2014-cü ildə Prezident İlham Əliyevin iştirakı ilə qoyulub. Layihəyə isə 45 milyon manata yaxın vəsait yönəldilib.
