Daşkəsən rayonunun Alunitdağ qəsəbəsi istiqamətində yerləşən avtomobil yolunda təhlükəli vəziyyət yaranıb.
Gencexeber.az-ın məlumatına görə, Alunitdağ–Daşkəsən avtomobil yolunda sel sularının təsiri nəticəsində çökmə baş verib. Hadisə qəsəbədaxili 3 kilometrlik yolun 2-ci kilometrliyində qeydə alınıb.
Məlumata əsasən, yaranmış problemin aradan qaldırılması istiqamətində artıq işlərə başlanılıb. Ərazi təhlükəsizlik məqsədilə çəpərlənib.
Daşkəsən Rayon İcra Hakimiyyəti yanında Fövqəladə Hallar Komissiyası və 31 saylı "Yol İstismarı" MMC tərəfindən əraziyə texnika cəlb olunub. Yolun üzərində olan qaya parçaları təmizlənib, eyni zamanda yolun genişləndirilməsi istiqamətində tədbirlər görülür.
Hazırda ərazidə nəqliyyatın hərəkəti təmin edilsə də, sürücülərə ehtiyatlı olmaları tövsiyə edilir.
Məlumat üçün qeyd edək ki, son günlər Gəncə və ətraf rayonlarda müşahidə olunan intensiv yağıntılar bir sıra ərazilərdə infrastruktur problemlərinə səbəb olub.
