Gəncədə sənədli filmin təqdimatı olub. Bu haqda 9 dekabr tarixində İcra Hakimiyyətinə istinadən xəbər veririk.
Sənədli film Vətən müharibəsi şəhidi Muxtar Qasımlıya həsr edilib. Tədbirə icra başçısı Niyazi Bayramov, YAP Gəncə Şəhər Təşkilatının sədri Bayram Aslanov, Aparatın məsul əməkdaşları, şəhid ailələri, müharibə iştirakçıları və şəhərimizdə fəaliyyət göstərən ali təhsil ocaqlarının tələbələri qatılıblar.
Burada YAP Gəncə Şəhər Təşkilatının könüllüləri tərəfindən vətənpərvər ruhda hazırlanmış rəqs və şeirlər təqdim edilib. Daha sonra film nümayiş olunub.
Ekran əsəri “Qəhrəman Muxtar Qasımlı” adlandırılıb. Şəhidin döyüş yolu, ömür səhifələri, uşaqlıq dövrü, məktəb illəri, idman sahəsində əldə etdiyi uğurlar və iş həyatı filmin süjet xəttini təşkil edib. Prodüser şəhid Muxtar Qasımlının atası Əli Qasımov, bədii rəhbər Almaz Qasımova, filmin rejissoru və ssenari müəllifi Ruslan Mollayevdir.
Qeyd edək ki, Muxtar Qasımlı müharibəyə ehtiyatda olan zabit kimi qatılıb. Onun döyüş yolu Füzulidə başlayıb və rayonun Alxanlı kəndində başa çatıb. Baş leytenant Muxtar Qasımlı 2 oktyabr 2020-ci il tarixində şəhidlik zirvəsinə ucalıb.
