Tovuzda kürəkən qayınatasını bıçaqlayıb.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsinin hakimi Abdulla Məmmədovun sədrliyi ilə keçirilib.
Belə ki, Tovuz rayonunda yaşayan Əli Məmmədov (ad şərtidir) Aygün Əliyeva (ad şərtidir) ilə qeyri-rəsmi ər-arvad münasibətində yaşayır. Bir gün sosial şəbəkədə tanış olduğu qadınla görüntülü danışan zaman Aygün buna şahid olur. Ərinin xəyanətinə görə qadın uşaqlarını götürüb atası evinə gedir. Bir neçə gün sonra Əli içkili vəziyyətdə uşaqlarını görmək üçün qayınatasıgilə gəlir. Uşaqlarını və arvadını ona göstərməyən qayınatası Vaqif Əliyevi (ad şərtidir) 8 dəfə bıçaqlayır.
Əli Məmmədov Azərbaycan Respublikası CM-nin 29, 120.2.4-cü (xüsusi amansızlıqla qəsdən həyatdan məhrum etməyə cəhd) maddələri ilə təqsirləndirilib.
Məhkəmədə təqsirləndirilən şəxs qismində dindirilən Əli Məmmədov özünü ittiham üzrə qismən təqsirli bilib. İfadəsində göstərib:
“Dekabrın 17-si içkili vəziyyətdə evə gəldim. Axşam saatlarında “İnstagram”da bir xanımla tanış oldum. Elə həmin qadınla görüntülü danışan zaman həyat yoldaşım Aygün içəri girdi. Bizim danışdığımızı görüb donub qaldı və otaqdan çıxıb atasıgilə getdi. Cinayəti isə 22 dekabr tarixində törətdim. Axşam evdə spirtli içki qəbul edərkən övladlarım yadıma düşdü. Uşaqlarımı görmək üçün qayınatamgilə getdim. Qayınanam qapıda məni qarşılayıb “içkilisən, get sonra gələrsən” dedi. Bu vaxt qayınatam nalayiq ifadələr işlətməyə başladı. Həmin sözləri eşitməzliyə vurub içəri keçdim. Qapı aralı olduğu üçün baxanda kişinin əlində bıçaq gördüm. Mənə nəsə edəcəyini düşünüb mətbəxdən bıçaq götürdüm. Yoldaşımın atası bu an üstümə gələrək bıçağı mənə tərəf atdı amma mənə dəymədi. Nalayiq sözlər və bu hərəkətindən əsəbiləşərək əlimdəki bıçaqla ona dəfələrlə zərbə endirdim”.
Məhkəmə baxışı zamanı iş üzrə zərərçəkmiş Vaqif Əliyev ifadə verib:
“Dekabrın 17-si qızım evimə gələrək yoldaşı ilə dalaşdığını və bizdə qalacağını bildirdi. Əli səhəri gün mənə zəng edib ailəsini istədiyini dedi. Mən də “bir müddət keçsin, gəlib ailənlə danışıb problemlərinizi həll edərsiniz” deyib telefonu söndürdüm. Hadisə günü axşam Əli içkili vəziyyətdə bizə gəldi. Qapını açmadığımız üçün təpiklə vurub qırdı. Nalayiq ifadələr işlətməyə başladı. Özünü cilovlaya bilməyib mətbəxdən bıçağı götürüb üstümə gəldi. Özümü müdafiə etməyə çalışsam da, bir neçə bıçaq zərbəsinin dəydiyini hiss etdim. Sonra huşumu itirib, yerə yıxılmışam. Əlidən şikayətçiyəm”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Əli Məmmədov 14 il 6 ay müddətində azadlıqdan məhrum edilib.
Fidan İlqar
